El campaña del govierno contra con el proliferacion del mga pusil sin licensia na Central Mindanao y Bangsamoro Autonomous Region in Muslim Mindanao (BARMM) ya continua tene positive resulta.
El Western Mindanao Command (Westmincom) ya reporta cay mga oficiales del barrio na municipio del Aleosan na provincia del Norte Cotabato y dos barrio desde el “Special Geographic Area (SGA)” del BARMM ya rindi con mga tropa del govierno 31 diferente clase de pusil de alta calibre sin licensia y dos granada del Lunes.
Asegun con el Westmincom cay el voluntariamente rindida del mga pusil es un resulta del esfuerso contra proliferation del mga armas de fuego sin licensia del 602nd Infantry Brigade, 34th Infantry Battalion, y policia del municipio del Aleosan.
El Alcalde Eduardo Cabaya amo el quein ya encabesa con el presentacion del mga armas de fuego sin licensia.
El mga oficiales del barrio quien ya entrega mga pusil sin licensia ya firma tamen promesa de compromiso para el pacifico y enbuenamente eleccion para del mga oficiales de barangay y del sector de los jovenes.
“Ay sustene came con el campaña y trabaja junto en cooperacion del mga govierno local para puede logra el objetivo common,” ya habla si Major General Steve Crespillo, el comandante del Westmincom. (B. Garcia, photo courtesy of 602nd Infantry Brigade)