Un “high-value individual (HVI)” suspechao el ya aresta mientras valor de P1.5 millon droga ilegal el ya confisca mga autoridad na un campaña contra droga aqui na ciudad de Zamboanga, el policia local ya anuncia del Miercoles.
Si Police Colonel Alexander Lorenzo, el Zamboanga City Police Office (ZCPO) director, ya nombra con el arestao HVI suspechao como si Edmar Sakilan Suhaili, 27, un chufer de tricycle y residente del Sitio Caragasan na Barangay Maasin, en este ciudad.
Si Lorenzo ya habla cay con Suhaili ya aresta na un “buy-bust operation” mga ala 1:55 del Miercoles aga na Zone 5, Barangay Tulungatung, este ciudad.
Si Lorenzo ya habla cay enseguidas ya aresta con Suhaili despues que ya complete el transaccion de droga ilegal entre el suspechao y un secreta de policia.
Asegun con Lorenzo ya puede confisca na posesion de Suhaili 234.81 gramos de suspechao shabu que tiene el valor de P1,596,708, markao P1,000, y 49 pedaso de P1,000 que ya usa como “boodle money”.
Asegun con Lorenzo el arestao suspechao y el mga confiscao evidencia ya pone bajo el custodiya del ZCPO en preparacion para el plantada del asunto por violacion del “Comprehensive Dangerous Drugs Act of 2002”. (B. Garcia, photo courtesy of ZCPO)