Un oficial de barangay el ya muri y su compañero el ya salva na un incidente de tiroteo na provincia del Zamboanga del Sur, asegun con el policia del Martes.
Asegun con el policia, el incidente ya socede del Sabado tarde na Purok Lasermanas, Barangay Poblacion, San Miguel, Zamboanga del Sur.
El policia ya identifica con el fatalidad como si Jomar Requilme, 37 años el edad y barangay kagawad del Lantawan, San Miguel.
El policia ya identifica con el compañero de Requilme con quien nohay pasa nada como si un tal Johny.
Base na investigacion, ta maneja motorciclo si Requilme y ta sige conele ancas si Johny cuando ya tira con el oficial de barangay el mga suspechao muntao na otro motorciclo que ya atraca serca canila dos.
Asegun con el policia, enseguidas ya escapa el mga suspechao mientras ya lleva si Johny con Requilme na hospital, pero ya declara muerto con el oficial el doctor apenas ya llega na facilidad medical.
El policia na municipio de San Miguel ta continua del ila investigacion para determina si cosa el motivo y si quien el mga suspechao del incidente. (B. Garcia)