Ya aresta mga otoridad con el numero siete “most wanted” persona na municipio del Saguiran, Lanao del Sur.
Si police Brigadier General Allan Nobleza, el director del Police Regional Office-Bangsamoro Autonomous Region (PRO-BAR), ya nombra con el arestao suspechao como si Akiya Mustapha, 48 años el edad.
Asegun con Nobleza con Mustapha ya aresta na Barangay Sunggod, Saguiran, Lanao del Sur del Huwebes. El suspechao amo el aka-siete “most wanted” persona na municipio de Saguiran.
Si Nobleza ya abla cay si Mustapha tiene pendiente orden de aresto por el crimen de “Slight Physical Injuries and Maltreatment” y “illegal discharge of firearms.”
Durante su aresto, asegun con Nobleza, ya puede tamen recrubri mga pulis con un calibre .45 pistola na posesion de Mustapha.
Si Nobleza ya comenda con el mga pulis por el de ila esfuerso que ya resulta na aresto de Mustapha. (B. Garcia, photo courtesy of PRO-BAR)