Ya recubri mga soldao con mga materiales de guerra del “Bangsamoro Islamic Freedom Fighters” na municipio de Ampatuan, Maguindanao del Sur.
Asegun con Major General Alex Rillera, el comandante del Joint Task Force (JTF)-Central, cay con el mga materiales de guerra ya recubri na Barangay Salman, Ampatuan, del Huwebes.
Si Rillera ya habla cay ta conduci ofensiva mga soldao del 40th Infantry Battalion (IB) cuando ya puede sila encontra con un kuta del BIFF na Barangay Salman.
El kuta tiene siete paksols que puede acomoda 10 personas cada uno del paksol.
Durante el inspeccion, asegun con Rillera cay el mga soldao ya puede recubri na kuta mga materiales de guerra que ta incluwi mga cosas ta usa para ase bomba, mga bala de Armalite, bandolier, materiales de construccion, mga caldero y otro pa mga las cosas personal del mga BIFF.
Asegun con Rillera cay tiene mga senyales el mga BIFF ya sale na lugar un dia antes que ya descubri mga soldao con el ila kuta.
Myentrastanto, si Tiniente Heneral Roy Galido, el comandante del Western Mindanao Command (Westmincom), ya comenda con el mga soldao del 40IB por el deila buen acomplisimiento. (B. Garcia, photo courtesy of Westmincom PIO)