Seis personas el ya aresta myentras mas de P7.4 milyon valor de contrabando ya confisca mga otoridad durante un campanya contra “smuggling” aqui na ciudad de Zamboanga.
Asegun con police Colonel Alexander Lorenzo, el Zamboanga City Police Office (ZCPO) director, cay con el mga suspechao ya aresta y contrabando ya confisca mga alas 10:30 Biyernes denoche na vicinidad del isla de Sinunuc, este ciudad.
Si Lorenzo ya nombra con el mga arestao suspechao como el mga siguientes: Julamad Banggali, 38, maestro patron del jungkung; Nurman Imlani, 17; Ronald Banggali, 33; Elvin Jaladil, 26; Almajar Salim, 38; y si Teting Salem, 35.
Asegun con Lorenzo cay mga personajes del “2nd Zamboanga City Mobile Force Company (2ZCMFC)” ta conduci patrulya na mar cuando ya columbra sila con un jungkung con seis tripulantes.
Durante el inspeccion, mga pulis ya descubri cay lleno de cahon de diferente clase de cigarillo el jungkung.
Asegun con Lorenzo, el jungkung ta carga 211 cahon de cigarillo con el estimao valor de P7,385,000. El mga cigarillo estaba na Jolo, Sulu, y para lleba aqui na ciudad de Zamboanga.
Asegun con Lorenzo cay enseguidas ya aresta con el seis tripulantes y ya confisca con el mga contrabando despues que ya falya sila presenta documento del de ila cargamento.
El seis tripulantes, y mga cigarillo, incluwido el jungkung, ya pone bajo na custodiya del “2ZCMFC” antes que ay entrega na Buro de Aduana para el propio disposicion. (B. Garcia, photo courtesy of ZCPO)