Un bien “wanted” persona el ya aresta mga autoridad na un operacion de implementacion de ley na provincia del Lanao del Sur, el policia ya anuncia del Viernes.
Si Police Colonel Robert Daculan, el director del policia na Lanao del Sur, ya nombra con el arestao como si Hamdani Dimao.
Asegun con Daculan con Dimao ya aresta mga alas 6:30 del Jueves denoche na Barangay Mantapoli, Marantao, Lanao del Sur.
Asegun con Daculan, si Dimao listao como el numero seis wanted persona na Marantao y tiene el pendiente orden de aresto por el crimen de matansa sin recomendao piansa que ya dale el un tribunal del ciudad de Marawi del Septiembre 26, 2022.
Con Dimao ya pone bajo na custodia del policia na municipio del Marantao.
Si Daculan ya comenda con mga personajes del policia de Marantao por el exitoso aresto de Dimao. (B. Garcia, photo courtesy of Lanao del Sur Police Provincial Office)