Un persona listao como el numero tres “most wanted” persona base na systema de “E-Warrant” el voluntaryamente ya rindi con mga otoridad aqui na ciudad de Zamboanga.
Si Police Major Albin Cabayacruz, el hefe del Zamboanga City Police Station 11 (ZCPS11), ya nombra con el acusao quien ya rindi como si Federico Oblea, 46 años el edad y residente de Montezuma Heights, Barangay Canelar, este ciudad.
Asegun con Cabayacruz si Oblea voluntarymente ya rindi mga alas 8:12 del aga del Miyercoles con Police Staff Sergeant Roberto Francisco na quartel del ZCPS11.
Si Cabayacruz ya habla cay si Oblea tiene pendiente orden de aresto por violacion del “Comprehensive Dangerous Drugs Act of 2002” sin recomendao piansa que ya dale el un tribunal aqui na ciudad del Hulyo 25, 2023.
Si Oblea presentamente detenido na carcel del ZCPS11 y esperansao entrega conele na concierno tribunal. (B. Garcia, photo courtesy of ZCPS11)