Un pariente y de confiansa del alcalde del un municipio na provincia del Basilan ya muri na un incidente de tiro aqui na ciudad de Zamboanga.
Asegun con Police Major Albin Cabayacruz, el hefe del Zamboanga City Police Station 11 (ZCPS11), ya nombra con el victima como si Arkan Said, 25 años el edad y residente del ciudad de Isabela provincia del Basilan.
Asegun con Cabayadruz el incidente ya ocuri mga alas 4:45 del tarde del Martes na Uchida Drive, Calle Johnston, Barangay San Jose Gusu, este ciudad.
Si Cabayacruz ya habla cay base na investigacion, con Arkan ya tira myentras sintao le na su cuarto na casa de Hadji Rada Kahing, el nana de Arsina Kahing Nanoh, alcalde del municipio del Hadji Muhtamad na provincial de Basilan.
Asegun con Cabayacruz con el suspechao ya conose como si Kabal Kahing, subrino del alcalde.
El suspechao enseguidas ya escapa despues del incidente.
Asegun con Cabayacruz cay agravio personal el motivo del incidente.
Asegun con Cabayacruz cay ta man selos el suspechao con Said siendo el victima amo ta administra con el negocio de fescao del alcalde.
Si Cabayacruz ya habla cay ambos el victima y suspechao mga pariente de Alcalde Nanoh.
Myentrastanto, asegun con Cabayacruz cay ya puede sila aresta con Alsibal Hassan, el chuffer del motorsiclo que ya munta el suspechao na su escapada.
Si Cabayacruz ya habla cay ta ase sila enbuscada ahora con Kabal. (B. Garcia, photo courtesy of ZCPS11)