Ya muri el un negociante na un incidente de tiro na carretra nacional na provincia del Zamboanga del Norte, asegun con el pulisiya.
Si Police Colonel Glenn Dulawan, el director del pulisiya na Zamboanga del Norte, ya habla cay el incidente ya ocuri mga 6:25 del noche del Martes na Barangay Kipit, Labason, Zamboanga del Norte.
Si Dulawan ya nombra con el victima negociante como si Osman Tapsin, 67 años el edad y residente del Barangay Kipit, Labason.
Asegun con Dulawan cay base na investigacion, si Tapsin ta maneja motorsiclo de camino pa bolbida para na Barangay Kipit estaba na Barangay Osukan, Labason cuando ya tira conele el un desconosido persona muntao na otro motorsiclo que ta sigi na atras del victima.
Enseguidas ya escapa el suspechao myentras mga concierne residentes ya lleba con Tapsin na Labason District Hospital para el curada medical.
Por mal suwerte, ya declara el doctor cay muerto ya si Tapsin cuando ya llega na ospital.
Asegun con Dulawan mga pulis ya puede recubri na lugar del crimen un calilbre .45 pistola con un bala que ta cre sila cay del victima el pusil.
Asegun con Dulawan cay el pulisiya del Labason ta continua de ila investigacion para determina el motivo y si quien el echor del incidente. (B. Garcia)