El numero dos bien “wanted” na uno del mga municipio na provincial del Zamboanga del Norte ya aresta mga otoridad, el pulisiya ya anuncia del Biyernes.
Si Police Lieutenant Colonel Glenn Dulawan, el director del pulisiya na provincia del Zamboanga del Norte, ya nombra con el arestao suspechao como si Roland Guitao Tagapan, 25 años el edad, un siembrador y residente del Purok Rubia, Barangay San Antonio, Polanco.
Asegun con Dulawan con Tagapan ya aresta por medio na implementacion del un orden de aresto mga alas 3:20 del Huwebes tarde na Sitio Tilukan, Barangay Saluyong, Manukan, Zamboanga del Norte.
Asegun con Dulawan cay si Tagapan listao como el numero dos bien wanted persona na municipio del Polanco na provincia del Zamboanga del Norte.
Si Dulawan ya habla cay si Tagapan tiene pendiente orden de aresto por el crimen de abuso sexual sin recomendao piansa que ya dale el un jusgado del ciudad de Dipolog, Zamboanga del Norte del Deciembre 3, 2021.
Asegun con Dulawan con Tagapan ya pone bajo na custodiya del pulisiya na municipio del Polanco. (B. Garcia)