El mga autoridad exitosamente ya aresta na un operacion de aplicacion de ley con el uno del mga personas mas buscada na provincia del Maguindanao del Norte, asegun con el policia del Viernes.
El Police Regional Office-Bangsamoro Autonomous Region (PRO-BAR), ya identifica con el arestao persona mas buscada como si alias Mundas Anok, quien conocido tamen como si alias Perut, legal el edad.
Asegun con el PRO-BAR, con Anok ya aresta na un operacion de aplicacion de ley por medio na implementacion de un orden de aresto mga alas 4:30 del Martes tarde na Sitio Pinto, Barangay Renede, North Upi, Maguindanao del Norte.
Asegun con el policia, si Anok tiene pendiente orden de aresto sin recomendao piansa por violacion del Ley Integral de Drogas Peligrosas del 2002 que ya dale el un corte na ciudad de Cotabato del Febrero 6, 2024.
El policia ya habla, si Anok listao como el numero 10 persona mas buscada na provincia del Maguindanao del Norte.
Asegun con el policia, con Anok ya pone bajo’l custodia del Criminal Investigation and Detection Group Maguindanao Provincial Field Unit. (B. Garcia)