Cuatro mga desconocidos armao personas el ya abducta con un Americano na barangay costero na provincia del Zamboanga del Norte, asegun con el policia del Viernes.
Si Police Brigadier General Bowenn Joey Masauding, el director del mando regional del policia, ya identifica con el victima como si Elliot Onil Eastman, 26 años el edad de Vermont, Estados Unidos de America.
Asegun con Masauding, con Eastman ya abducta mga alas 11 del Jueves denoche na su residencia na Sitio Tungawan, Barangay Poblacion, Sibuco, Zamboanga del Norte.
Asegun con Masauding, con Eastman forsaomente ya abducta el cuatro suspechao, quien ya pretende como mga miembros del autoridad.
Si Masauding ya habla, uno del cuatro suspechao ya tira na pierna con Eastman cuando ya resisti el Americano con el mga suspechao.
El mga armas personas forsaomente ya ase munta con Eastman na un banca de motor que ya enderesa para na mar.
Si Eastman, quien ya casa con un nativo de Sibuco, ta esta ya dentro de sinco meses na Barangay Poblacion, Sibuco.
Si Masauding ya habla, ya activa ya sila todo recursos de ila para busca y salva con Eastman.
Si Masauding, hunto con otro oficiales y personajes del mando regional del policia ya anda del Viernes aga para na Sibuco para personalmente supervise con el operacion de rescate de Eastman. (B. Garcia)