El mga autoridad ya aresta con sinco personas cuando ya intercepta sila enviao carne de tiboron na un privado pantalan na ciudad de Zamboanga, asegun con el policia el Viernes.
El Zamboanga City Maritime Police Station (ZC MARPSTA) nohay mas identifica con el sinco arestao personas puera lang de hablar ta inclui sila un maestro patron y cuatro tripulantes de un lancha.
Asegun con el policia, con el sinco ya aresta del Martes que ya resulta tamen na confiscacion del mga carne de tiboron na un privado pantalan na Barangay Baliwasan, ciudad de Zamboanga.
El policia hunto con mga personajes del Oficina de Pesca y Recursos Acuaticos y Oficina Comunitaria de Medio Ambiente y Recursos Naturales ya conduci el operacion cuando ya recivi sila informacion cay tiene ta descarga carne de tiboron desde un lancha, nombra como el ML Aslinda na privado pantalan.
Asegun con el policia, el mga arestao tripulantes del lancha hay enfrenta caso por violacion del Seccion 102 del Ley de Republica 10654, que ta prohibi el pescada o sacada del mga escaso, amenasao, y especies en peligro.
El mga arestao suspechao, el mga confiscao carne de tiboron y lancha ya pone bajo’l custodia del ZC MARPSTA para el propio disposicion.
Ya confisca tamen un trak que ta usa para lleva con el carne de tiboron na Mercado publico na ciudad de Zamboanga.
El policia ya sabe, el mga carne de tiboron estaba na municipio del Pangutaran na provincia del Sulu. (B. Garcia)