Uno del mga personas mas buscada na Bangsamoro Autonomous Region in Muslim Mindanao (BARMM) el ya aresta el mga autoridad na un operacion de aplicacion de ley na provincia del Lanao del Sur, asegun con el policia del Martes.
El Police Regional Office-Bangsamoro Autonomous Region (PRO-BAR), ya identifica lang con el aresto persona mas buscada como si alias Pepeng, con quien ya aresta del Domingo na Barangay Puga-an, ciudad de Marawi, Lanao del Sur.
Asegun con el PRO-BAR, con Pepeng ya aresta el mga pulis durante el implementacion de un orden de aresto que ya encabesa el Criminal Investigation and Detection Group (CIDG) base na Lanao del Sur, siguiendo el persistente bisiada en enbuscada con el suspechao.
Asegun con el PRO-BAR, si Pepeng tiene pendiente orden de aresto con recomendao P120,000 piansa por el crimen de robo que ya dale el un corte na ciudad de Marawi, Lanao del Sur, del Julio 25, 2023.
El PRO-BAR ya habla, si Pepeng listao como el numero 10 persona mas buscada na BARMM based na sistema de E-warrant.
El policia ya habla, con Pepeng ya puede aresta con el ayuda del mga oficiales del Barangay Puga-an, ciudad de Marawi.
Si Police Brigadier General Prexy Tanggawohn, el interino director del PRO-BAR, ya alaba con el mga personajes del policia quien ya puede aresta con Pepeng, un bien conocido mas buscada criminal na region autonomo.
Asegun con Tanggawohn, el arestada del mga personas mas buscada ta hace con el comunidad protejido y ta hace con el region autonomo un segurao lugar para vive y man negocio. (B. Garcia)