El Naval Task Force (NTF)-61 ya inicia cambio na liderato del BRP-Jose Loor Sr (PC390), un barco de patrulla bajo na control del Naval Forces Western Mindanao (NFWM), asegun con el militar del Martes.
Asegun con el 4th Civil Relations Group (4CRG), con Lieutenant Commander Randolph Ramiro ya instola como el nuevo comandante del PC390 y ya releva le con Commander Jay Roxas.
El ceremonia del cambio del mando ya hace del Lunes na Estacion Naval Romulo Espaldon na Barangay Calarian, ciudad del Zamboanga.
Asegun con el 4CRG, con el ceremonia del cambio del mando ya supervisa si Capitan Hilarion Cesista, el deputy commander for fleet operations y el juesped de honor durante el ceremonia amo si Rear Admiral Francisco Tagamolila Jr., el comandante del NFWM.
Durante el ceremonia, con Roxas ya regala medalla de la cruz de bronze por su excepcional trabajo mejorando con el seguridad maritima na region.
Ya recivi tamen si Roxas el medalla de merito militar desde’l fuerza de combate costera del Flota Filipina o Philippine Fleet.
El PC390 es uno del mga barco de patrulla del fuerza naval que ta guardia con el teritorio maritima del Filipinas.
Ya comisiona del 1997, el PC390 ta esta un importante parte del esfuerzo del NFWM para guardia con el region. (B. Garcia)