Un persona mas buscada el ya aresta mga autoridad na un operacion de aplicacion de ley aqui na ciudad de Zamboanga, asegun con el policia local del Lunes.
Asegun con Coronel Alexander Lorenzo, el director del Zamboanga City Police Office, con el arestao persona mas buscada ya conose como si Tampusan Mentay, 26 años el edad y residente de Barangay Poblacion, Lapuyan, Zamboanga del Sur.
Asegun con Lorenzo, con Mentay ya aresta na un operacion de aplicacion de ley por medio na implimentacion del un orden de aresto mga alas 10:34 del Viernes denoche na Calle Don Alfaro, Barangay Tetuan, en este ciudad.
Asegun con Lorenzo, si Mentay tiene pendiente orden de aresto por el crimen de calificao estatutorio abuso carnal sin recomendao piansa que ya dale el un corte na municipio de San Miguel, Zamboanga del Sur del Deciembre 6, 2023.
Asegun con Lorenzo, si Mentay listao como el numero uno persona mas buscada na municipio de Lapuyan, Zamboanga del Sur.
Si Lorenzo ya habla, con Mentay ya pone bajo’l custodia del Zamboanga City Police Station 6 antes de entrega conele na concierne corte. (B. Garcia)