Total de 22 armas de fuego sin licensia el ya rindi mga vivientes del mga municipios de Ungkaya Pukan, Tipo-Tipo, y Albarka na provincia de Basilan, asegun con el 101st Infantry Brigade del Lunes.
Con el mga armas de fuego—siete de alta calibre y 15 de bajo calibre—ya recivi si Brigadier General Alvin Luzon, el comandante del 101st Infantry Brigade, durante un ceremonia na municipio de Tipo-Tipo, Basilan del Sabado.
Asegun con el 101st Infantry Brigade, con el mga pusil sin licencia ya rindi por medio del programa del gobierno del provincia de Basilan nombrao como el “Small Arms and Light Weapons (SALW)”.
Asegun con el 101st Infantry Brigade, el rindida del mga armas de fuego es resulta del continuando colaboracion entre con Tiniente Coronel Michael Colanta, el comandante del 45th Infantry Battalion y Alcalde Jomar Maturan de Ungkaya Pukan, Alcalde Arcam Istarul de Tipo-Tipo y Alcalde Jaydeefar Lajid de Albarka y de ila mga trabajador barrio capitan.
Durante el programa del Sabado, si Colanta con el ayuda del tres alcalde ya presenta y formalmente ya entrega con el mga pusil sin licensia con Luzon.
Na su mensaje, si Luzon ya comenda con el activo participacion y cooperation del mga barrio capitan, mga alcalde y vivientes del mga municipio de Ungkaya Pukan, Tipo-Tipo y Albarka por el de ila suporta na programa del SALW del gobierno provincial de Basilan.
El 101st Infantry Brigade es un pareja del gobierno del provincia de Basilan na implimentacion del programa de SALW.
Ta servi tamen el 101st Infantry Brigade como el custodio del mga rindido pusil antes el final disposicion base na reccomendacion del gobierno local. (B. Garcia, photo courtesy of 101st Infantry Brigade)