El Naval Forces Western Mindanao (NFWM) ya transporta total del 48.2 tonelada de diferentes clase comestibles o “relief goods” para distribuji con mga victima del Septiembre 7 kema na Bongao, Tawi-Tawi, el NFWM ya anuncia del Martes.
Asegun con Rear Admiral Donn Anthony Miraflor, el comandante del NFWM, el varco BRP-Ivatan que ya transporta con el mga comestibles ya llega na pantalan del Bongao, Tawi-Tawi del Lunes.
El mga comestibles ta incluwi 4,636 enpaketao comida, 129 cahon de medicina, 1,250 cosas de dormir, sinco cahon de mga camisa, 150 “modular tents”, y otros pa mga cosas ta necesita mga victima del kema.
Total de 670 familyares el ya afecta na kema del Septiembre 7 que ya rasa mas o menos 100 casa na Calle Kahapon, Barangay Poblacion, Bongao, Tawi-Tawi.
El mga relief goods estaba na Ministry of Social Welfare and Development in Bangasamoro Autonomous Region in Muslim Mindanao (MSSD-BARMM), Department of Social Welfare and Development-9 (DSWD-9) y oficina rehyonal del defensa civil.
Asegun con Miraflor con el mga relief goods ya descarga el mga personajes del fuersa marino, guardia costal, mando del pulisiya maritima, y del govierno municipal del Bongao y ya entrega na oficina de Mary Anne Abdul Munak, el administrador del municipio del Bongao.
Con el mga relief goods ay distribuji con mga familyares afectao na ensendio o kema.
Asegun con Miraflor cay su mando pirmi preparao para extende ayuda con mga sector necesita de ila ayuda. (B. Garcia, photo courtesy of NFWM)