Zamboanga: Pulis ya aresta 4 tripulantes, ya confisca P2.9 milyones contrabando

0
18

Ya aresta cuatro tripulantes de un “jungkung” y ya confisca P2.9 milyones cantidad de contrabando mga otoridad na campanya contra “smuggling” aqui na ciudad de Zamboanga, el pulisiya local ya anuncia del Martes.

Asegun con Police Lieutenant Colonel Reynald Ariño, el hefe del 2nd Zamboanga City Mobile Force “Seaborne” Company (2ZCMFC), con el mga tripulantes ya aresta y mga contrabando ya confisca mga alas 10:20 del Lunes denoche na vicinidad del isla de Tumalutap, ciudad de Zamboanga.

Si Ariño ya nombra con el cuatro arestao tripulantes del jungkung como canda Takam Awang Julhakim, 43; Mahajir Hadjiruddin Ahadin, 39; Udjah Aylaya Usab, 54; y si Mahsin Mukam Usman, 48.

Asegun con Ariño cay su personajes que ta encabesa si Tiniente Ariel Jolatoria ta man patrulya na mar cuando ya columbra sila con el jungkung, nombrao como el FB Ommayah 3, ta navega na vicinidad del isla de Tumalutap.

Asegun con Ariño, ya descubri el grupo de Jolatoria cay lleno de cahon de diferente clase de cigarillo el FB Ommayah 3 cuando ya inspecciona sila con el jungkong.

Enseguidas ya aresta el grupo de Jolatoria con el cuatro tripulantes y ya confisca con el mga cigarillo despues que ni uno de ila nohay puede presenta documentos del de ila cargamento.

Asegun con Ariño cay el jungkong ta carga total de 84 cahon de diferente clase de cigarillo que tiene el valor de P2,940,000.

Base na investigacion cay el mga smuggled cigarillo estaba na Jolo, Sulu y para lleba na Parang, Maguindanao.

Con el cuatro tripulantes, jungkong y mga cigarillo bajo ahora na custodiya del 2ZCMFC para el documentacion y esperansao entrega para na Buro de Aduana para el propio disposicion. (B. Garcia, photo courtesy of 2ZCMFC)

Leave a Reply