El “Naval Forces Western Mindanao (NFWM)”, por medio del “Naval Task Force-61 (NTF-61)”, ya salva con tres gente desde un lancha rapida en anguista na mar de Tawi-Tawi, asegun con el NFWM del Sabado.
El NFWM ya nombra con el salvao tres gente como el mga siguientes: Tony Misuari, el operador del lancha rapida y su dos pasajeros si Al-Shaikul Sanul y Natalie Shabun.
Asegun con el NFWM, con el tres ya salva el mga personajes del BRP-Jose Loor, Sr. (PC-390) na vicinidad del isla de Omapoy, Sibutu, Tawi-Tawi del Miercoles.
El NFWM ya habla cay el NTF-61 ya despelga con el PC-390 despues que el parientes del uno del tres pasajeros del lancha rapida ya llama na “Littoral Monitoring Station (LMS)-Bongao” hablando ya perde sila comunicacion canila y el de ila locacion.
Asegun con el NFWM, el tres pasajeros ya habla ya man anud sila na mar despues que ya queda malo el makina del de ila lancha rapida mientras ta viaja sila desde Malaysia para na municipio de Sibutu, Tawi-Tawi.
Enseguidas ya dale ayuda el mga personajes con el tres salvao gente mientras ta hala con el de ila lancha rapida para na Sibutu.
Ya entrega canila na gobierno municipal del Sibutu para el propio disposicion y omento ayuda. (B. Garcia)