El militar y policia ya establisa ya mga checkpoints na mga estrategico lugar na provincia de Basilan para enforsa con el prohibicion de armas durante el periodo del eleccion.
Si Brigadier General Alvin Luzon, el comandante del 101st Infantry Brigade (101Bde) y su diputado comandante, si Coronel Frederick Sales, ya inspecciona con el preparacion del mga checkpoints del militar y policia durante el primer hora de este dia de Domingo.
El periodo del prohibicion de armas efectivo Enero 12 hasta acaba el eleccion na Mayo 12, este año.
El inspeccion del mga checkpoints ya conduci en colaboracion con el Basilan Provincial Police Office, que ta encabesa si Coronel Cerrazid Umabong.
Asegun con el 101Bde, con el mga checkpoints ya establisa na diferentes parte del Basilan como el punto de control na lindero de Barangay Balagtasan, ciudad de Lamitan, y Barangay Baluno, ciudad de Isabela.
Asegun con el 101Bde, el mga checkpoints con designao mga personajes hay enforsa con el prohibicion de armas durante el period de eleccion.
El prohibicion de armas es parte del medidas de seguridad para previni mga incidents relatao na conducida del eleccion na Mayo 12, este año. (B. Garcia)