Ya aresta el mga autoridad con un maestro patron de un lancha y ya confisca P680,000 valor de droga ilegal na un campaña contra droga na ciudad de Zamboanga, asegun con el policia del Viernes.
El Special Operations Unit-9 (SOU-9) del Philippine National Police Drug Enforcement Group (PDEG) ya identifica lang con el arestao maestro patron como si alias Sunny, 58 años el edad y residente de Barangay Tandu-Bato, Luuk, Sulu.
Asegun con el SOU-9, con Sunny ya aresta na un operacion de compra busto mga alas 12:20 del Jueves denoche na Xanadu Subdivision, Barangay Baliwasan, ciudad de Zamboanga.
Asegun con el SOU-9, ya confisca na posesion de Sunny 100 gramos de suspechao shabu enpaquetao na dos termosellada transparente plastico sobrecitos que tiene el valor de P680,000, dos balutan de robar dinero (boodle money), que ya pone encima un real P1,000 como markao dinero, un portamoneda, y un celpon.
Asegun con el SOU-9, con Sunny ya pone bajo’l custodia del Zamboanga City Police Station 11 en preparacion para el plantada del asunto contra conele por violacion del Ley Integral de Drogas Peligrosas de 2002.
El SOU-9 ya habla, el operacion de compra busto ya conduci con el suporta del otro unidades del policia, y inteligencia del militar. (B. Garcia)