El mga autoridad ya aresta dos personas mas buscada na separao operaciones de aplicacion de ley na Zamboanga Peninsula, asegun con el policia del Viernes.
El mando regional del policia, o Police Regional Office-9 (PRO-9), ya identifica con el dos arestao personas mas buscada como canda Adrian Jorolan Ybañez, y si Jessie Boy Santiago Sabalbaro.
Si Ybañez clasificao como el numero cuatro persona mas buscada na region y numero tres na provincia del Zamboanga Sibugay mientras si Sabalbaro numero cuatro persona mas buscada na ciudad de Dapitan, Zamboanga del Norte.
Asegun con el policia, con Ybañez ya aresta na un operacion de aplicacion de ley por medio de implementa’r un orden de aresto mga alas 5 del Miercoles tarde na Barangay Pangi, Ipil, Zamboanga Sibugay.
El policia ya habla, si Ybañez tiene pendiente orden de aresto sin recomendao piansa por el crimen de 24 cuentas de estatutorio abuso carnal que ya dale el un corte de familia na Ipil, Zamboanga Sibugay del Enero 13, 2025.
Con Ybañez ya pone bajo’l custodia del policia na municipio de Ipil para el propio proceso y disposicion.
Asegun con el policia, con Sabalbaro ya aresta na semehante operacion de aplicacion de ley mga alas 7:50 del Miercoles denoche na Sitio Lawaan, Barangay Banonong, ciudad de Dapitan.
Asegun con el policia, si Sabalbaro tiene pendiente orden de aresto sin recomendao piansa por el crimen de estatutorio abuso carnal que ya dale el un corte de familia na ciudad de Dapitan, del Noviembre 4, 2024.
Asegun con el policia, el aresto del dos personas mas buscada ta dale mira el continuando dedicacion del PRO-9 para enseguias aresta con mga individuales envuelto na bien malo crimen y asegura el servida del justicia.
El PRO-9 junto con el socio unidades enforsadores de ley, hay continua persigue y coge otro mga individuales mas buscada para mantene el paz y orden na region. (B. Garcia)