Un persona el ya aresta y P1.7 millones valor de contrabando el ya confisca el mga autoridad na campaña contra smuggling na provincia del Zamboanga Sibugay, asegun con el policia del Viernes.
El mando regional del policia, o Police Regional office-9 (PRO-9), nohay identifica con el arestao persona, quien un 38 años obrero, pendiente mas de invetigacion.
Asegun con el policia, con el obrero ya aresta y con el contrabando ya confisca mga alas 10:50 del Miercoles denoche na Barangay Baganipay, Talusan, Zamboanga Sibugay.
Asegun con el policia, ya confisca na posesion del obrero 30 cajon de cigarillo sin documento que tiene el valor de P1,719,000.
Asegun con el policia, con el arestao obrero ya pone bajo’l custodia del policia na municipio del Talusan para mas proceso y legal accion.
El mga confisca contrabando ya entrega na custodia del Buro de Aduana para el propio disposicion.
El mando regional del policia hunto con el socios enforsadores de ley ta continua esta vigilante y dedicao para combate contra actividades de smuggling na region. (B. Garcia)