Un informante del pulisya local ya muri na un incidente de tiro anoche alli na Sitio Agrarian, Barangay Patalon, este ciudad.
Asegun con el Police Station 10 cay el victima, si Norbie Jumrani Jawali, cuarenta’y siete anios el edad, ya tira un desconosido persona mga alas seis y media anoche myentras sintao ele na fuente del Sitio Agrarian, Barangay Patalon.
Asegun con el pulisiya cay el victima ya sufri cuatro irida de bala na su cuerpo y ya declara con este muerto el doctor na opsital.
Mga pulis ya recubri dos capsula de calibre cuarenta’y sinco pistol na lugar del incident.
Ta continua investiga el pulisiya para sabe si cosa el motivo y tambien sabe si quien el suspechao del incidente.
Myentastanto, el govierno local ya cambia temporaryamente el direccion del trafico por cause del kema alli na Baliwasan.
Mga vehiculo estaba na costa weste debe enderesa na barrio de San Jose Gusu para anda na pueblo myentras mga vehiculo estaba na Campo Islam debe pasa na Baliwasan Grande pa andada na pueblo.
Ya serra el govieno local con el calsada na Baliwasan seaside para dale lugar con mga bombero apaga con el fuego na bodega del Phidco. (April Boy Regino)