Dos casa el ya kema na un incidente de incendio aqui na ciudad, asegun con el “Zamboanga City Fire District” del Domingo.
Si Superintendent Christopher Morales, el ZCFD marshal, ya habla el incendio ya ocuri na Felisario subdivision, Barangay Divisoria, en este ciudad del Domingo madrogada.
Si Morales ya nombra con el dueño del dos casas que ya kema como canda Aubrey Melbourne Cruz, 40 años el edad, y si Junick Marcos Faustino, 33, cuñao de Aubrey.
Base na investigacion, el kema ya principia na un vacante posento na casa de Melbourne y ya engranda el fuego hasta ya afecta con el casa de Faustino. Ambos mga afectao casa echo de palo.
Asegun con Morales, con el fuego ya puede contene mga alas 3:35 del aga y completamente ya puede apaga mga alas 3:42 del Domingo aga.
Si Morales ya habla, el estimado valor de destroso de propiedad ya alcansa na P310,000.
Sin embargo, asegun con Morales ya precura pa sila determina si cosa el causa del incendio que a alcansa na primer alarma. (B. Garcia, photo courtesy of ZCFD)