El mga operativas de Philippine Drug Enforcement Agency (PDEA) ya aresta dos personas y ya confisca valor de P3.4 millon droga ilegal na un campaña contra droga aqui na ciudad, asegun con el PDEA del Domingo.
El oficina regional del PDEA ya nombra con el dos arestao suspechao como canda Mukni Hadari Sajiran, 35 años el edad y residente del Barangay Lunggang, Panamao, Sulu; y si Altany Sadidol Salihuddin, 21 y residente del Barangay Latih, Patikul, Sulu.
Asegun con el PDEA, con el dos suspechao ya aresta na un “buy-bust operation” mga alas 7:50 del Viernes denoche na Paseo de Ruste, Barangay San Jose Cawa-Cawa, en este ciudad.
Asegun con el PDEA, ya puede recubri na posesion del dos arestao suspechao 500 gramos de suspechao shabu que tiene el valor de P3.4 millon, mga P1,000 “boodle money” que ya pone insima un verdadero P1,000 como markao sen, un celpon, y un portamoneda.
Ya detene el PDEA con el dos arestao suspechao en preparacion para el plantada del asunto contra canila por violacion del “Comprehensive Dangerous Drugs Act of 2002”. (B. Garcia, photo courtesy of PDEA-9)