29.9 C
Manila
Friday, March 1, 2024

Zamboanga: DENR ya recubri ‘Brahminy kite’

- Advertisement -

El Departamento de Medio Ambiente y Recursos Naturales o el DENR ya pone con un pajaro conosido como el “Brahminy kite” bajo el cuidada del “Regional Wildlife Rescue Center” na Barangay Baclay, Tukuran, Zamboanga del Sur.

Asegun con el DENR, el Brahminy Kite ay esta bajo el rehabilitacion na mencionao facilidad antes que ay larga con el pajaro na su habitat natural.  

Asegun con el DENR, el mga personajes del “Community Environment and Natural Resources Office (CENRO)” na Ramon Magsaysay, Zamboanga del Sur, ya recubri con el adulto Brahminy kite del otro semana na Barangay Poblacion, Mahayag, na mismo provincia.

El DENR ya habla cay si Eleasar Gella, un residente del Barangay Poblacion, Mahayag, ya columbra con el pajaro ya abaja na tiera desde un pono’y palo na atras del su casa.

Si Gella, ya cuji con el Brahminy kite creyendo cay mansiao el pajaro por causa tiene este rebentao pamaa na isquierda pie.

Despues que ya cuji le con el pajaro, si Gella ya pone el retrato de este na su “social media account” para lleva na atencion y entrega con el Brahminy kite na agencia del DENR.

Base na evaluacion del mga personajes del DENR, el pajaro ta esta na buen salud, tiene el pesades de media kilo y 43 centimetros el anchor de alas del Brahminy kite.

El DENR ya habla, ya lleva derecho con el pajaro Regional Wildlife Rescue Center na Barangay Baclay, Tukuran, para el propio cuidada antes que ay larga con este na su habitat natural.

Ta ase acorda el DENR con el publico, prohibido cuji mga fauna silvestre (wildlife) para cuida bajo el Acto Republica Numero 9147 que ta conserva y proteje con mga recursos animales y de ila habitat. (B. Garcia, photo courtesy of CENRO-Ramon Magsaysay, Zamboanga del Sur)

 

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -