Un suspechao clasificao como un individual de alto valor o “high-value individual (HVI)” el ya aresta y P510,000 cantidad de droga ilegal el ya confisca mga autoridad na un campaña contra droga aqui na ciudad.
Si Tiniente Coronel Helen Galvez, el portavoz del mando regional del policia, nohay mas nombra con el arestao suspechao puera lang de hablar cay un 31 años ele y residente del Barangay San Jose Gusu, en este ciudad.
Asegun con Galvez, con el suspechao ya aresta na un operacion de compra busto (buy-bust operation) mga alas 7:50 del Sabado denoche na Purok 5, Barangay Malagutay, en este ciudad.
Asegun con Galvez, ya recubri na posesion del arestao suspechao 75 gramos de suspechao shabu enpaquetao na dos sobrecitos de claro plastico con el valor de P510,000, un motorciclo, un bolso de cinturon, 74 papel de P1,000 robar dinero o “boodle money” que ya pone insima un real P1,000 como markao dinero.
Asegun con Galvez con el arestao suspechao ya detene na quartel del policia local en preparacion para el plantada de asunto contra conele. (B. Garcia)