El mga personajes del “Housing and Land Management Division (HLMD) ya conduci “census tagging” y “spot mapping operations” na lugar del Marso 31 incidente de incendio na Purok 4, Barangay Labuan, en este ciudad.
Asegun con el informacion publico del gobierno local del Viernes, el conducida del spot mapping operation amo para establisa un inventario, distintivo entre el parcialamente y totalmente destrosao estracturas.
Durante el actividad, el mga personajes del HLMD ya administra “family intake sheets” para saca detaliao informacion aserca el cada familia afectao na incendio.
Treinta’y siete casa el ya man uput mientras sinco otros el parcialmente ya quema durante el incidente de incendio del Domingo denoche na Purok 4, Barangay Labuan, 36 kilometros oeste del ciudad.
El Alcalde John Dalipe ya encabesa con el distribucion de ayuda con el 42 familias quien afectao na incendio.
Si Dalipe ya asegura con el mga victima del incendio cay el gobierno local hay extende canila ayuda que ta necesita sila. (B. Garcia)