El Guardia Costal el Pilipinas ay construji un nuevo facilidad para sirvi como el quartel del “Coast Guard District Southwestern Mindanao (CGDSWM) y otro mga mando bajo el agencia base aqui na ciudad de Zamboanga.
El nuevo facilidad ay construji na 1.38 hectarya de tierra adentro na tereno del Zamboanga Special Economic Zone and Freeport (ZamboEcozone) na Sitio San Ramon, Barangay Talisayan, na costa weste del ciudad.
Si Vice Admiral Ronnie Gil Gavan, el diputado comandante para el administracion del guardia costal del Pilipinas, Commodore Marco Antonio Gines el comandante del CGDSWM, y si Raul Regondola, el administrador del ZamboEcozone, quien un PCG Auxiliary con el ranggo de commodore, ya encabesa con el ceremonya de “groundbreaking” del Sabado.
El nuevo facilidad ta incluwi un pantalan, moderno centro del mando y otros pa mga estractura como el grandstand.
Por medio de un especial areglo, el ZamboEcozone ya dale con el guardia costal del Pilipinas 1.38 hectarya para pone con el quartel del CGDSWM, sinco hectarya centro de entreno rehyonal y otro sinco hectarya para del otro oficina bajo na CGDSWM.
El antes alcalde Manuel Dalipe, quien el primer administador del ZamboEcozone, mga oficiales del guardia costal, militar, pulisiya, y del otro agencia de govierno incluwido el representante del un companiya de construccion ya man testigo con el ceremonya de groundbreaking para el principio del proyecto.
Presentamente, el quartel del CGDSWM talli na Naval Station Romulo Espaldon na Barangay Campo Islam. (B. Garcia, photo courtesy of CGDSW)