Un personaje de un companiya de koreo el ya perde P800 mil na un holdap na provincia del Zamboanga Sibugay, asegun con el pulisiya.
Si Police Colonel Eduard Mallo, el director del pulisiya na provincia del Zamboanga Sibugay, ya nombra con el victima como si Roderick Dela Cerna, 30 años el edad, un supervisor del “J&T” na municipio del Ipil.
Asegun con Mallo el incidente ya ocuri mga alas 11:15 del Sabado aga na Purok Gemelina, Barangay Sanito, Ipil, el cabesera del provincia del Zamboanga Sibugay.
Si Mallo ya habla cay base na investigacion, si Dela Cerna ta maneja su motorsiclo llevando P800,000 dinero para deposita na Palawan Pawnshop cuando ya nota le dos motorsiclo con dos personas muntao cada uno que ta sigi conele na atras.
Derefente ya lang, el uno del dos motorsiclo ya man una y ya ataja con Dela Cerna y ya declara holdap myentras ta apunteria pusil na cabesa del victima.
El mga suspechao ya escapa para na direccion del centro del pueblo de Ipil despues el incidente.
Asegun con Mallo ta continua el investigacion para sabe si quien el mga suspechao y possible aresta canila. (B. Garcia)