Dos personas el ya iri na un kema que ya raza mga casa mayoriya echo de palo dejando 139 familiares sin casa aqui na ciudad de Zamboanga.
Asegun con Superintendent Christopher Morales, el Zamboanga City Fire District (ZCFD) marshal, cay el kema ya susede mga alas 8:36 del Domingo denoche na Paseo de Tambucho, Barangay Camino Nuevo, este ciudad.
El Zamboanga City Police Office ya nombra con el dos personas ya iri como canda John Loyd Delos Reyes, 21 años el edad y si Lyn Paborado, 29, quien ya sustene irida na derecha pierna y derecha talon, respectivamente.
Si Morales ya habla cay base na investigacion, el fuego ya principia na residencia de Joel Sali que derepente ya engranda y ya man calayat para na mga bisinos que mayoriya mga casa echo de palo.
Si Morales ya habla cay ya puede sila controla con el fuego mga alas 10:35 del Domingo denoche and completamenta ya apaga mga alas 3:31 del Lunes aga.
Asegun con Morales cay ta investiga pa sila si cosa el causa del kema myentras el estimao destroso de propiedad inicialmente ya pone na P1 milyon.
Myentrastanto, el Alcalde John Dalipe ya designa con el mga covered courts na Barangay Canelar, Sta. Maria, y Sto. Niño como mga temporaryo centro de evacuacion del mga victima del kema.
Ya diriji tamen si Dalipe con el City Social Welfare and Development Office (CSWDO) para ase de fronto de evaluacion y el dalida de ayuda con mga familya afectao na incidente. (B. Garcia, photo courtesy of Mayor John Dalipe Facebook page)