El Alcalde John Dalipe ta continua ayuda y suporta con el sector de seguridad del ciudad de Zamboanga.
Si Dalipe ya entrega del Lunes 10 motorsiclo con Police Colonel Alexander Lorenzo, el Zamboanga City Police Office director.
Con el valor de P1.5 millon, con el mga motorsiclo ya compra usando el fondo de paz y orden del año 2022.
Asegun con Dalipe cay su administracion ta esta comitido suporta con el sector de seguridad para na bien interes del mga Zamboangueños.
Asegun con Dalipe cay ta suporta todo mga iniciativa y advocacia del mga agentes de ley para asegura el seguridad del mga vivientes.
Con el mga nuevo motorsiclo ya entrega si Dalipe con Lorenzo durante el ceremonia de la bandera enfrente de City Hall.
Asegun con Lorenzo, grande ayuda el 10 motorsiclo para na de ila conducida de patrulla na diferente parte del ciudad.
Recientamente, el ZCPO ya implementa con el “Night Rider Cuida Vida Zamboanga” que ta conduci patrulla usando motorsiclo cada noche na diferente barrio del ciudad. (B. Garcia, photo courtesy of City Government of Zamboanga Facebook page)