Un persona quien tiene pendiente orden de aresto el ya aresta mga autoridad mientras ta saca le “National Police Clearance”, el pulisiya local ya anuncia del Martes.
Asegun con Police Colonel Alexander Lorenzo, el director del Zamboanga City Police Office, con el arestao persona ya conose como si Abdella Hamsali, 22 años el edad y residente de Barangay Ayala, en este ciudad.
Asegun con Lorenzo, con Hamsali ya aresta mga ala 1:44 del Lunes tarde na Zamboanga City Police Station 11 na calle Governador Lim, en este ciudad.
Si Lorenzo ya habla con Hamsali ya aresta despues que ya gole el mga personajes del ZCPS11 cay tiene le pendiente orden de aresto mientras ta saca le National Police Clearance.
Asegun con Lorenzo, si Hamsali tiene pendiente orden de aresto por violacion del Republic Act 7610, el ley que ta dale especial proteccion con mga bata contra abuso, exploitacion, y acto de discriminacion con recomendao piansa de P180,000 que ya dale el un tribunal del ciudad de Zamboanga del Enero 18, 2021.
El asusao detenido na quartel del ZCPS11 para el propio disposicion. (B. Garcia)