El govierno local ya puede colecta P47.5 milyones total impuesto dentro el periodo de nueve meses na operacion del dos mercao publico y cuatro mga “night markets”.
Asegun con el Assistant City Administrator Cesar Raz cay el mercao publico na pueblo ya puede colecta P26.9 milyones myentras el Sta. Cruz Commercial Complex ya encontra P19.9 milyones.
Na operacion de cuatro “night markets”, el govierno local ya puede colecta impuesto na cantidad P677.450.24.
El locasion del mga night markets ta incluwi na mga calle del Rizal, Mercado, Juan S. Alano, y na terminal del bus na Barangay Divisoria.
Myentrastanto, asegun con Raz cay tiene plano el govierno local abre omento uni night market na Barangay Pasonanca.
Con el mga night market ya establisa bajo el orden del Alcalde John Dalipe para dale opotunidad y comportable lugar donde el mga “small-time” negociantes y mga agricultor puede sila bende de ila mga productos. (B. Garcia, photo courtesy of City Hall PIO)