El gobierno local ya inagura este dia de Lunes, Julio 29, con el 10 nuevo comprao ambulancia para mejora el respondida medical de salud ng mga barangays na ciudad de Zamboanga.
El Alcalde John Dalipe y Vice Alcalde Josephine Pareja amo el ya encabesa con el inaguracion del mga ambulancia que ya hace enfrente del City Hall.
Asegun con Dalipe, el comprada del 10 ambulancia base na resolucion del 2017 del City Disaster Risk Reduction and Management Council (CDRRMC) y ya revive durante su termino.
“Despues de mucho años, hay realiza ya el resolucion para mejora el respondida medical de salud na de aton mga barangays,” si Dalipe ya habla.
Asegun con Dalipe, cada uno del ambulancia ya costa P2.5 millones y el dinero para el comprada ya saca desde’l 2023 fondo local de gestion y reduccion del riegos de desastres.
Asegun con Dalipe, dos del 10 ambulancia ya entrega con el Autoridad de Aviacion Civil de Filipinas y el Buro de Corecciones.
Asegun con Dr. Elmeir Apolinario, el jefe del City Disaster Risk Reduction and Management Office (CDRRMO), el comprada del mga ambulancia tiene el objetivo fortalece el sistema de respondida de emergencia.
Asegun con Apolinario, hay ayuda y suporta tamen con el activacion del 911 centro de llamadas local y complementa con el despelgada del mga vehiculos de respondida de emergencia na multiples lugar na ciudad. (B. Garcia)