Despues de dos meses vacacion, mga estudiantes desde K to 12 ya bira na mga escuelas na ciudad de Zamboanga este dia, Lunes Julio 29, el primer dia de clase para el año 2024-2025.
Asegun con el Division de Escuelas na Ciudad, total de 198,850 estudiantes el ya enrola ambos na escuelas publicos de elementaria y secundaria na ciudad desde’l dia de Domingo Julio 28.
Na total numero ya enrola, 98,951 el hombres mientras 99,899 el mujeres.
Sin embargo asegun con el Division de Escuelas na Ciudad, el numero del mga estudiantes que hay enrola esperansao hay omenta ng mga dias que viene.
Base na memorandum del Departamento de Educacion, el clase na educacion basico debe comenza na Julio 29, 2024, Lunes, y hay acaba na Mayo 16, 2025, dia de Viernes.
El vacacion para el año de escuela 2023-2024 ya comensa Mayo 31, 2024. (B. Garcia)