El gobierno local ta sustene con el entregada de agua na mga barangay afectao na escasez de agua por causa el largo tiempo de secas.
El Alcalde John Dalipe ya diriji el despelgada del mga tanke de agua del City Disaster Risk Reduction and Management Office desde Lunes hasta Domingo inclui dia de vacacion para ayuda alivia el situacion del mga residentes na mga barangay que ya experiencia corto servicio de hora o nohay agua como resulta del el fenomeno del El Niño.
El Zamboanga City Water District (ZCWD) ya reporta cay significante ya abaja el de ila produccion del de ila tuburan cada dia que ya resulta na extendido hora de racion del agua na costa este, oeste y na centro parte del ciudad.
El mga barrio que ya servi el tanke de agua del gobierno del ciudad ta inclui el Campo Islam, San Jose Gusu, Calarian, Sinunuc, Maasin, Cawit, Tulungatung, Arena Blanco, Mampang, Talon-Talon, Kasanyangan, Sta. Maria, Cabatangan, Cabaluay y Malagutay.
El CDRRMO ya apela con el mga residentes quien ta sufri na paltada de agua para cordina na de ila consejo de barangay para puede llega canila agua na de ila mga lugar.
Aparte con el facilidad de agua del CDRRMO, el Oficina de Proteccion contra Incendios ya despelga tamen sinco trak para lleva agua na mga oficina de gobierno. (B. Garcia)