Total del 270 adulto y bata el ya beneficia na un programa de servicio comunitario que ya conduci el 64th Infantry Battalion (IB) con el objeto para promove paz y desarollo na provincia del Basilan.
Asegun con el 64IB na un anuncio, 150 del 270 beneficiarios del programa que ya conduci del Viernes Santo na Barangay Upper Benembengan amo mga adulto y el restante 120 mga bata.
Asegun con el 64IB, el mga beneficiarios ya recivi enpaquetao comida y diferentes clase de merienda. Ya conduci tamen libre cortada de pelo, y juego de alegria para del mga bata, y ya dale equipajes de deportes con mga estudiantes.
Asegun con el 64IB, el programa de servicio comunitaria tiene el objeto para fomenta un sentido de espiritu comunitario y de cooperacion, que esencial para el bienestar y prosperidad del municipio, en particular, y del provincia, en general.
El actividad ya establisa tamen un mafuersa coneccion con el mga residentes, y ya dale ayuda y suporta con el comunidad en varias aspetos, asegun con el 64IB.
Na su mensaje, si Tiniente Coronel Abel Potutan, el comandante del 64IB, ya expresa su sincero gratitud con el mga residentes del Barangay Upper Benembengan por el de ila calorosa bienvenido que ya extende con el tropa del su mando y por el intermidable suporta para promove paz y orden na lugar.
Con el actividad activamente ya participa el Barrio Capitan Huraman Yrama del Upper Benembengan; Arjid Jackatul, maestro-en-cargao del escuela de elementaria de Upper Benembengan; Asrin Janul, el secretario del Barangay Upper Benembengan en asociacion con el gobierno del municipio de Sumisip y Oficina de Desarollo y Bienestar del Municipio. (B. Garcia)