El Gobernador de Basilan Jim Hataman-Salliman ya diriji con Police Lieutenant Colonel Allan Benasing, el oficial-en-cargao del 1st Provincial Mobile Force Company, para intensifica el estricto seguridad na su lugar de jurisdiccion, particularmente na ciudad de Lamitan.
Si Salliman ya dale el orden cuando si Benasing y su diputado, si Police Lieutenant Brian Bon, ya visita de cortesia con el gobernador na capitolio del Jueves.
El orden de Salliman ya vene despues del serie de holdap y otro incidentes de crimen ya ocuri na ciudad de Lamitan.
Quiere si Salliman que todo mga echor de crimen ay aresta y pone na preso.
Con Benasing, quien ya servi antes como hefe del policia na ciudad de Lamitan, ya designa como oficial-en-cargao del 1st Provincial Mobile Force Company de mas temprano de este semana.
De mas temprano, el policia del ciudad de Lamitan que ta encabesa si Police Lieutenant Colonel Arlan Delumpines, en coordinacion con el 101st Infantry Brigade ya implementa apretao y estricto medidas de seguridad.
El medidas ta inclui el conducida de 24-hora “checkpoint operations” na todo lugar de entrada y salida del ciudad de Lamitan, conducida de patrulla, y 24-hora bisiada na mga suspechao kuta del mga mal elementos de sociedad.
(B. Garcia, photo courtesy of Ronda del Basilan)
