Si Brigadier General Nestor Narag, comandante del 2nd Marine Brigade (2MBde), ya visita na municipio de Sapa-Sapa, Tawi-Tawi para engrana con el liderato local y diriji su tropas, asegun con el militar del Viernes.
El 4th Civil Relations Group (4CRG), el visitada de Narag na Sapa-Sapa del Jueves dirijido para reinforsa con el compromiso del 2MBde na paz, seguridad y desarollo del provincia.
El 4CRG ya habla, si Narag ya man hunta con el jefes ejecutivos locales para discuti compromiso de seguridad, asuntos y precoupaciones y desarollo na municipio de Sapa-Sapa.
Asegun con el 4CRG, el dialogo ya man centro na mejorada del infrastractura y implementada de iniciativas comunitaria, ambos para impulsa el progreso del lugar.
El mga lideres del gobierno local ya expresa el de ila gratitud por el continuando esfuerzos del 2MBde na mantencion de seguridad, que ta reconoce sila como vital na continuando crecimiento y estabilidad del provincia.
Ademas, ya conferi tamen si Narag con el mga fuerzas marino despelgao na Sapa-Sapa.
Asegun con el 4CRG, si Narag ya proporciona guia para alinea de ila operaciones con el directiva del comandante para fortalece relaciones civico-militares y suporta con el programas de servicio na comunidad.
Asegun con Narag, ese esfuerzo de relaciones civico-militares es esencial para gana el confiansa y cooperacion del mga residentes.
Ya evalua tamen si Narag el moral del mga tropas, asegurando el de ila bienestar y preparacion para compli de ila mision na provincia de Tawi-Tawi. (B. Garcia)