El mga autoridad ya aresta con un persona mas buscada na un operacion de aplicacion de ley na provincia del Tawi-Tawi, asegun con el policia del Viernes.
Asegun con el Police Regional Office-Bangsamoro Autonomous Region (PRO-BAR), con el arestao persona mas buscada ya conoce como si alias Eppang, un mujer y legal el edad.
Asegun con el PRO-BAR, con Eppang ya aresta na un operacion de aplicacion de ley por medio del implementacion de orden de aresto maga alas 7 del Miercoles denoche na Barangay Simandagit, Bongao, Tawi-Tawi.
Asegun con el policia, si Eppang tiene pendiente orden de aresto por el crimen de homicidio con P40,000 recomendao piansa que ya dale el un corte na Bongao, Tawi-Tawi del Julio 31, 2014.
El policia ya habla, si Eppang listao como el numero cuatro persona mas buscada na municipio del Panglima Sugala, Tawi-Tawi.
Asegun con el policia, con Eppang ya pone bajo’l custodia del Criminal Investigation and Detection Group na provincia de Tawi-Tawi para documentacion antes que hay entrega conele na corte que ya dale el orden de aresto para el propio disposicion.
Si Police Brigadier General Prexy Tanggawohn, el interino director del PRO-BAR, ya expresa su alto respeto por el galantria que ya demostra el mga operativas que ya resulta na un grande acomplicimiento.
“Este por causa na continuando implementacion del Oplan Pagtugis para aresta contodo’l personas mas buscada que ta busca el ley na entero region autonomo,” si Tanggawohn ya habla. (B. Garcia)