Ya discuti canda Brigadier General Alvin Luzon, comandante del 101st Infantry Brigade, y Alcalde Talib Pawaki del Hadji Mohammad Ajul, mga maneras si quemodo puede continua suporta el militar na programa de paz y orden, seguridad y sustenable desarollo del municipio.
Ese el mga conciernes del discusion de canda Luzon y Pawaki cuando ya visita de cortesia el general con el alcalde na municipio del Jueves.
Ademas, ya reconoce si Luzon el importancia del asociacion con el gobierno local del Hadji Mohammad Ajul na campaña de seguridad y advocacias de paz del brigada na isla provincia de Basilan.
“Debe kita trabaja hunto como socios para logra paz duradera y desarollo del Hadji Mohammad Ajul,” ya habla si Luzon.
El municipio del Hadji Mohammad Ajul ta servi como el casa del mga miembros del Moro Islamic Liberation Front (MILF) quien ta espera demobilizacion bajo el completo implimentacion del normalizacion del nuevo aprovao programa de amnestia.
Durante su visita de cortesia con Pawaki, ya acompania con Luzon el otro mga alto oficiales de militar y del MILF base na provincia del Basilan. (B. Garcia, photo courtesy of 101st Infantry Brigade)