El mga personajes del Fuerza Naval ya coge un lancha ta transporta valor de P64 millon contrabando na vicinidad del un isla na provincia de Tawi-Tawi, asegun con el Naval Forces Western Mindanao (NFWM) del Domingo.
Asegun con Read Admiral Donn Anthony Miraflor, el comandante del NFWM, con el lancha, nombrao como el M/L Yasmen, ya coge del Sabado serca na isla de Manuk Mangkaw, municipio de Simunul, Tawi-Tawi.
Asegun con Miraflor, ta conduci rutina patrulla de seguridad maritima el mga personajes abordo na BRP-Jose Loor, Sr., cuando ya puede sila columbra con el M/L Yasmen.
Si Miraflor ya habla, el mga personajes del BRP-Jose Loor, Sr., ya descubri cay ta transporta el M/L Yasmen mga cigarillo sin el propio documentos que tiene el valor de P64 millon.
Asegun con Miraflor, con el mga confiscao cigarillo, el lancha y tripulantes ya entrega el mga personajes del BRP-Jose Loor, Sr. na Buro de Aduana para el propio disposicion.
Asegun con Miraflor, el cogida del mga contrabando ta demonstra cay bien comitido el Fuersa Naval para guardia con el borde y combate con mga ilegal actividades, incluido contrabando que ta ase de menos con el seguridad nacional y integridad economico. (B. Garcia)