Dos suspechao el ya aresta y P17 millon valor de droga ilegal el ya confisca mga autoridad na campaña contra droga na Bangsamoro Autonomous Region in Muslim Mindanao (BARMM) y na Zamboanga Peninsula, asegun con el Philippine Drug Enforcement Agency (PDEA) del Domingo.
Un soldao el ya iri mientras otro uno suspechao el ya puede escapa cuando ya man tirahan mga autoridad y vendedor de droga ilegal durante el campaña contra droga na BARMM.
El PDEA ya nombra con el mga arestao suspechao como canda Sakura Astung alias Toh y si Omar Sapaat, 36 años el edad.
Asegun con Gil Cesario Castro, el director del PDEA-BARMM, con Astung ya aresta na un “buy-bust operation” del Sabado medio dia na Barangay Tagbak, Indanan, Sulu.
Asegun con Castro, ya iri el un soldao despues que ya tira con el mga operativas el cohorte de Astung, con quien ya conose lang como un tal Jhim, despues que ya gole ele cay ta transacta sila droga ilegal con mga autoridad.
Asegun con Castro, con el irido soldao que nohay mas ele nombra, ya lleva na hospital mientras si Jhim ya puede escapa.
Asegun con Castro, ya puede recubri na posesion de Astung dos kilos de suspechao shabu enpaquetao na dos transparente sobrecitos que tiene el valor de P13.6 millon, un celpon, un motorciclo, y compra busta dinero o “buy-bust money”.
Si Castro ya habla, con Astung ya puede aresta por medio del suporta del fuerza militar, policia y operativas de “National Intelligence Coordinating Agency”.
Asegun con Maharani Gadaoni-Tosoc, el director del PDEA na Zamboanga Peninsula, con Sapaat, quien un chufer de habal-habal, ya aresta na un “buy-bust operation” mga alas 12:30 del Sabado tarde na Purok Ochid, Barangay Poblacion, Alicia, Zamboanga Sibugay.
Asegun con Gadaoni-Tosoc, ya recubri na posesion de Sapaat mas o menos 500 gramos de suspechao shabu que tiene el valor de P3.4 millon, un motorciclo, ocho balutan de “boodle money” que ya pone insima un real P1,000 que ya usa como “buy-bust money”.
Asegun con el dos oficiales del PDEA, ay planta asunto contra con el mga suspechao por violacion del Comprehensive Dangerous Drugs Act of 2002. (B. Garcia)
