Un persona el ya iri myentras otro el sin palyo na un incidente de tiro que ya ocuri maga alas seis anoche na municipio del Alicia provincia de Zamboanga Sibugay.
Si Coronel Eduard Mallo, el official encargao del pulisya na Zamboanga Sibugay, ya nombra con el victima como si Avegay Aranas, cuarenta’y dos años el edad y un empleyado del govierno municipal del Mabuhay na mismo provincia.
Asegun con Mallo cay el incidente ya ocuri maga alas seis ayer tarde na Barangay Dawa-Dawa, Alicia, Zamboanga Sibugay.
Si Mallo ya habla cay ta sigi ankas si Aranas na motor que ta maneja si James Taguiwalo, veinte cuatro años el edad, cuando un desconosido persona muntao na otro motor ya tira con el victima quein ya cay na motorsiclo.
Ya sinti lang si Taguiwalo ya cay su ankas cuando ya sinti le ya keda libiano su motor.
Si Taguiwalo, quein sin palyo durante el incidente, ya puede pa ele mira ya tumba el motor del suspechao y ya cay el armas de fuego que ya usa na crimen cuando ya bira ele para pipina con Aranas.
El suspechao ya escapa para na direccion del municipio de Alicia, Zamboanga Sibugay, maskin que ya sinti le duele y ya iri cuando ya tumba su motor.
Asegun con Mallo el investigador del crimen ya puede recubri el calibre cuarenta’y sinco pistola del suspechao na lugar del incidente.
Con Aranas ya lleba para na hospital para cura su maga irida na cuerpo. (Bong Garcia, Jr.)