Un empleado del gobierno, quien includio na lista de objetivo regional del mga personalidad de droga, el ya aresta el mga autoridad na un operacion contra droga na provincia del Zamboanga Sibugay. El oficina regional del Philippine Drug Enforcement Agency (PDEA), ya identifica con el arestao empleyado de gobierno como si alias Kenette, 34 años el edad y un residente del Calle Sampaguita, Barangay Poblacion, Imelda, Zamboanga Sibugay. Asegun con el PDEA-Zamboanga Peninsula, con Kenette ya aresta na un operacion de compra busto mga alas 2:30 del Miercoles tarde na Purok Mabini, Barangay Poblacion, Imelda. Asegun con el PDEA, con Kenette enseguidas ya aresta despues que ya vende le suspechao shabu con un secreta del agencia. El PDEA ya habla, ya recubri na posesion de Kenette, quien un chufer de gobierno, mas o menos tres gramos de suspechao shabu que tiene el valor del P20,400, un motorciclo, dinero de compra busto, y otros pa cosas personal. Asegun con el PDEA, con Kenette hay planta el caso por violacion del Secciones 5 y 11 del Ley Integral de Drogas Peligrosas de 2002. El operacion de compra busto ya conduci el PDEA-Zamboanga Peninsula con el suporta del Regional Special Enforcement Team, en coordinacion con el oficina del PDEA na Zamboanga Sibugay y policia del municipio del Imelda. (B. Garcia) (Photo Courtesy of PDEA- Zamboanga Peninsula)