El mga oficiales del Departamento de Medio Ambiente y Rescursos Naturales, o DENR, ya larga con un salvao ibid na su habitat natural na provincia del Zamboanga del Norte. Asegun con el DENR-Zamboanga Peninsula, con el ibid ya larga de otro semas na Barangay Patawag, Liloy, Zamboanga del Norte. El DENR-Zamboanga Peninsula, ya habla con el ibid ya encontra embrollao na corral de rede de pesca de Richard Sordilla, un vigilante de mar, na Barangay Patawag village y ya reporta na Oficina de Medio Ambiente Comunitario y Recursos Naturales, o CENRO, del Liloy. Asegun con el DENR, el grupo del Protected Area Management and Biodiversity Conservation Unit que ta encabesa si Silvicultora Merlou Rebuyas ya inspecciona con el ibid y ya confirma nohay este irida y na buen condicion para larga. El DENR ya habla, si Heracleo Calasang, Jr., diputado jefe del Cenro-Liloy, Barrio Capitan Chito Lubandino del Patawag, y Sordilla ya man testigo con el largada del ibid na su habitat natural. El DENR-Zamboanga Peninsula ya apela con el publico para reporta algun observacion de vida silvestre o concierne para el propio manejo, rescate, y operaciones de recuperacion. (B. Garcia)